لە داوێنی گەزگا تا سێبەرێ له باوەمەحموو

وێنەکانی ئەدوێن بۆمان و چاوی کامێراکەی هەردەم جوانیەکانی ئەم نیشتمانەی دەرخستووە بۆمان.

لە بنەڕەتدا خەڵکی ئاوایی زەکریانە سەر بەشارستانی سەوڵاوا و خۆشەویسی خاکی دێکۆن و باوەمەحموو لە دڵیدایە بەڵام گەورەبوو و پەروەردەی نژمارە و دڵی لەگەڵ شاخی گەزگا و شێخ ڕەش و شێخ مۆحەممەدی نژمار لێداوە و تینوویەتی وتاسەی دڵی بە کانی با شکاندووە.

لە 28ی پووشپەڕی 1362ی کۆچی هەتاوی چاوی بە ژیان هەڵێناوە و ئەم بەڕێزە کەسێک نیە بێژگە له سەیەد حەمزە دادگۆستەر  کە دایکی تەلعەتی شەریفی ناوە و ناوی باوکی سەیێد کاکەشێخە.

لە سەییەدەکانی باینچۆ و هەروەک کاک حەمزە دادگۆستر ئەفەرمن: «بە بۆنەی ئەوەی کە جەنابی باوەگەورەم شێخ حسەین دادگۆستەر مەڵا و مامۆستای ئایینی بووە لە ئاوایی زەکریانی سەوڵاوا و لەوێ مامۆستایی کردووە هەر لە زەکریان نیشتەجێ بوونە وئێستەش مەزاری باوەگەورەمان له ئاوایی نژماره  و خاتوون تووبا هاوسەری شێخ حسین کچی سەیید عەتای کەل بووە و لە سەرەتای ژیانیانا لە گوندی زەکریان بوونە و مەزاری خاتوون  سەیید تووباش لە ئاوایی وشکێنە، خاتوون تووبا ٦ کوڕ و یەک کچی بووە کە سەیەدان، کاکە شێخ، سەیێد جەمال، سەیێد کەمال، سەیێد بابەشێخ، سەیێد مەزهەر، سەیێد رەزا، و خاتوون خۆرشید تاکە کچی خاتوو تووبا بوونە؛ هەر بۆیه باوکی ئەم بەڕێزه دەبێتە

کچەزای سەیید عەتای کەل و ئەمیش دەبێتە کچەزازای سەیدعەتای باینچۆیی ناسروا بە عەتاکەل(لە بەر ئەوەی لێوی کەل بووە)

کە لێرەدا نامەوێ زۆر سەبارەت بە بەسەرهاتی سەیدعەتا بدوێم و تابەئەمڕۆ چەند کتێب لەو بابەتەوە لەچاپ دراون کە یەکیان کتێبێکە بە ناوی خەبات و بەسەرهاتی سەیدعەتای باینچۆیی نووسین و کۆکردنەوەی سەید سەلاح سەید نەجمەددین کوڕەزای سەیدعەتا و بەڕێز کاک کەیوان بەهرامی دزڵیش لە کتێبێ بە ناوی مذاکرات مرگبار لەم بابەتەوە نووسیوە و بەڕێز ناسری کانی سانانی و چەندکەسێکی تریش لەو بابەتەوەنووسینیان له چاپ داوە و تەنیا ئەڵێم کە لە ساڵی 1264ی ک.ە لە ئاوایی قەڵاتەڕەشەی دیوانداره چاوی بە ژیان هەڵێناوە و لە سەردەمی حەمە تاڵی بانە و مەحموودخانی کانیسانان ژیاوە و لە گۆڕستانی ئەسحابی سفید لە سلێمانی نێژراوە و ئەمڕۆکەش ئاسەواری سەنگەرەکانی لە پاڵی کێوی کوڕەمیانە و قەلەبەردو...ماوەتەوە»

سەییدحەمزە

سەرەتای خوێندنی لە گوندی نژمارتێپەڕ کردووە و دوواتر لە قوتابخانە وزانستگەکانی شارۆچکەی کانی دینار ومەریوان درێژەی بەخوێندن داوە و ماوەی 20ساڵ زیاترە خەریکی هونەری تەڕڕاحی و گرافیکە و لە ساڵی 1394ی کۆچی هەتاوی کارناسی گرافیکی له زانکۆی شاری گورگان وەرگرتووە و تا بە ئەمڕۆش چەند پیشانگای تایبەتی وێنەی لەشاری مەریوان داناوە و بەشداری چەندین فیستیواڵی نەتەوەیی و جیهانی بووە ولە درووستکردنی ئارم و نیشانی تایبەتی دەسگاکان و تەڕڕاحی فۆنتدا شارەزایی تەواوی هەیه وماوەی 15ساڵە وەک مامۆستایەکی فێرکاری لە بەشی وانەی گرافیک و وێنەگری لە دایرەی پەروەردە و قوتابخانەو هونەرستانەکانی شارەکانی سەوڵاوا و مەریوان خەریکی خزمەت و وانەوتنەوەیه و بۆ وێنە گرتن چاوی کامێراکەی بە  زۆرێک لە ناوچە جیاجیاکانی کوردەواری وەکوو شارەکانی مەریوان و سەوڵاوا و هەورامان، ناوچەکانی کەڵاتەرزان، کۆماسی، ژاوەرۆی سەوڵاوا، شامیان، سەرشێو، ژاوەرۆی سنە، سەلاسی باوەجانی، کرند، جوانڕۆ، بیجار و شوێنە مێژووییەکانی، مەهاباد و سەقز و... خشاندووە و لە شارەگەورەکانی ئێران وەکوو ئیسفەهان، ئەهواز، هەمەدان، تاران، تەورێزیش وێنەی سەبت کراوە و مامۆستاکانی لە وێنەگری هەر ئەو مامۆستایانە بوونە کە لە زانکۆی گۆرگان وانەکانیان پێ وتووە وەکوو ئۆستاد مۆحسێن سحەتی و ئۆستاد مۆختاری و ئیتر با وێنەکانی بدوێن بۆمان و ئەمەش چەند نموونەیەک لە وێنە و بەرهەمەکانی ئەم بەڕێزە:

سەرچاوەکان: وتووێژێ لەگەڵ بەڕێز سەیێدحەمزە دادگۆستە