دوو كتێبی بەنرخ دەربارەی مێژووی رۆژنامەگەری كوردی چاپ و بڵاوكرایەوە

ڕۆژان‌پرێس: کتێبی "رابەری ڕۆژنامەگەریی كوردی" (۱۹۰۶-۲۰۱۹ز) بەئامانجی ڕۆشنكردنەوەی لایەنێكی مێژووی میدیای كوردی لە مێژووی ئێراندا، بەقەبارەی ۶۳۸ لاپەڕە لەلایەن ڕۆژنامەی (كوردستانی نوێ) بڵاو كرایەوە، هەروەها سەرجەم ژمارەكانی رۆژنامەی "خۆرنشین"یش بەهەڵسەنگاندنێكی تێر و تەسەلەوە سەرلەنوێ چاپ كرایەوە.

دوکتۆر كارزان محەمەد ئوستادی زانكۆی پۆلیتەكنیكی سلێمانی كە خاوەنی هەردوو بەرهەمەكەیە، بە رۆژنامەی "ڕۆژان"ی راگەیاند:  ئەم ڕابەرە، ڕێنوێنییەكە بۆ تەواوی ئەو ڕۆژنامە و گۆڤارانەی دەچنە خانەی ڕۆژنامەگەریی كوردی و لەماوەی ساڵانی (۱۹۰۶-۲۰۱۹ز) لە كوردستان یا خود لە شارەكانیتری ئێران بڵاوكراونەتەوە (وەك: تاران، ئیسفەهان، خۆراسان، تەورێز، هەمەدان و...)

ڕایشیگەیاند: ڕۆژنامەگەری كوردی بەپێی قۆناغی مێژوویی پۆڵێن و شرۆڤە كراوە، بەشێوازێكی ئەكادیمی و بەسیستەمی پەراوێز ئاماژە بە سەرچاوەكان دراوە. بەپێی توانا، داتا و زانیاری ورد سەبارەت بەڕۆژنامە و گۆڤارەكانی تێدایە وەك: ناو و لۆگۆ و وێنەی ئۆرژیناڵ، ناوی خاوەن ئیمتیاز و بەرێوەبەری بەرپرس، شێوازی بڵاوبوونەوە، زمان، مێژووی بڵاوبوونەوە، بوار، شوێن، ئاراستە.

بەپێی قۆناغەكانی مێژووی ڕۆژنامەگەری كوردیش، پێڕستەكەی بەم چەشنەیە:

- رۆژنامەگەری لە سەردەمی قاجاردا.

- رۆژنامەگەری لە سەردەمی پەهلەویدا.

- رۆژنامەگەری لە سەردەمی كۆماری كوردستاندا.

 - رۆژنامەگەری لە سەردەمی ئینقلابی ئیسلامید

هەروەها دوو تەوەرەی گرنگیش تەرخان كراوە بۆ:

 - بڵاوكراوە خوێندكاری و ئەكادیمییەكان

 -رۆژنامە و گۆڤارەكانی دەرەوەی كوردستان

كۆمەڵێك سەرچاوەی گرنگ و دانسقەش لەم بەرهەمەدا بەكارهاتووە كە بریتین لە:

- نوسخەی ئۆرجیناڵی ڕۆژنامە و گۆڤارەكان، لە ئەرشیفی ئامادەكاردا پارێزراون.

- سەرچاوەكانی تایبەت بە مێژووی ڕۆژنامەگەری كوردی یا ئێرانی، (۴۵) بەزمانی فارسی و (۱۹) بەزمانی كوردی و (۲) بەزمانی ئینگلیزی و (۱) بەزمانی عەرەبین.

- دیدار و چاوپێكەوتن لەگەڵ خاوەن ئیمتیاز یا سەرنوسەرەكان.

-دیكۆمێنت (اسناد و مدارك) بۆ دەستنیشانكردنی ئاراستەی بڵاو كراوەكان، بەتایبەتی ڕۆژنامە و گۆڤارە كوردستانییەكانی سەردەمی قاجاری و پەهلەوی.

سەبارەت بە بەرهەمی دووەمیش، ناوبراو وتی:  رۆژنامەی "خۆرنشین" كە بە هەر دوو زمانی كوردی و فارسی لە شاری تاران چاپ كراوە، لە ماوەیەكی كورتی حكومڕانی پەهلەوی و لەسەردەمی (د.موسەدەق) لە ساڵی (۱۳۳۰ه.ش، ۱۹۵۱ز) بڵاوكراوەتەوە، سەرلەنوێ سەرجەم ژمارەكانیم چاپ كردۆتەوە و تیایدا هەڵسەنگاندن و پێرستم بۆ ناوەرۆكیشی كردووە. 

شایانی باسە دوکتۆر کارزان محەمەد ئامادەکاری ئەم دوو بەرهەمە، مامۆستای زانکۆی‌ پۆلیتەکنیکی سلێمانییە.

ڕۆژانامەی ڕۆژان
۲۹ی جۆزەردانی ۲۷۲۲ی کوردی
۲۹ی خوردادی ۱٤۰۱ی هەتاوی