ڕوحیان شاد و کەوشەنی خەیاڵمان پڕە لە یادیان و کاڵ نابێتەوە گوڵی ناویان لە دڵماندا و یادیان غونچەیەکی بەهاریە کە هەردێ و بەجوانیی دەپشکوێ.
سەفەر ئۆغرئەی لرفەی«سیروان»ی حەزم
ئەی بازەباڵتەزێوەکەی "کوڕەمیانە"
ئەی هەڵاڵە چاوتەڕەکەی داوێنی کەسکی «کۆساڵان»
بەتەنیایی
بۆ کوێ ئەڕۆی؟
چۆن دڵت دێ ئەم بەهارە
بڕۆی پشت هەڵکەی لەم شارە؟
خۆ هێشتا باڵای«سەوڵاوا»
تاسەی لە باڵات نەشکاوە!
پیرەپەڵکی بەری«مزگەوتی کاکەشێخ»
لەحەسرەتی دیتنەوەی تۆ داچەماوە
بۆکوێ ئەڕۆی؟
ڕۆیشتنی تۆ
کۆچی سووری خۆرەتاوە.
«بێوەر»
بەناوی خوای بێ وەک وبێ وێنە
دیسان«کۆساڵان» گەواڵە هەوری خەم دایدەپۆشێ و بەچاوێ پڕلەخوێنەوە ڕێژنە بارانی فرمێسک هەڵدەورێنێ...
دیسان پیرەپەڵکی بەری «مزگەوتی کاکەشێخ» قرپەیەک لە دڵی دێت و هەناسەیەکی پڕ لەخەم هەڵدەکێشێ
دیسان چاوی خۆم وپێنووسم ڕۆندکێ تری تێ دەچڕژێ
مەزنە مرۆڤێک لە ڕەگەزی «کوڕەمیانە»بەجێمان دێڵێت
مەکتەبێک پڕ لەوانە و باخێک پڕ لە نەمامی زانست، زەریایەک پڕلە هەستی نیشتمانپەروەرانە، گەلدۆستێکی خۆشەویست، کۆڵەکەیەکی قاییمی زمان، قەڵەمێکی بەهێز، قەڵایەک لە نەبەزی و کانگایەک له بیرۆکەی گەش، شاگردێکی تر لە شاگردەکانی«ئایەتۆڵڵا مەردۆخ»، کەسایەتیەکی خۆشناوی کوردستان، نووسەر و مێژووناس و زمانەوان
مامۆستا سەیید باوەشێخی حوسەینی کوڕی خواناسی خوالێخووشبوو حاج کاکەشێخی سەوڵاوا.
«مامۆستا باوەشێخ لە ساڵی 1954ی زایینی لەسەوڵاوا لەدایک بووە و خوێندنی قۆناغی سەرەتایی هەر لەسەوڵاوا و قۆناغی ناوەندی لە مەریوان و دوواناوەندیشی لە سنە تەواو دەکا و پاش ماوەیێ لە شاری کرمانشان خولی فێرکاری مامۆستایی تەواو دەکا و بەرگی پیرۆزی مامۆستایی دەپۆشێ بەڵام پاش سەرکەوتنی گەلانی ئێران بەسەر ڕژیمی پاشایەتیدا ئەویش وەک زۆرێ لە کەسانی تر دەکەوێتە بەر شاڵاوی لەکار لابردن و ماوەیێ بە کاری عەریزەنوویسی و باخەوانی لە سەوڵاوا سەرقاڵ ئەبێت و خویشی لەباخەوانی زمانی زگماگی و مێژووی گەلەکەی نەبوارد و بەپێی تەوانای تا دوایین هەناسەی خۆی بە ئەمەگناسی گەلەکەی دەزانی و زۆر وتاری لە چاپەمەنیەکاندا بڵاو کردووەتەوە کە ئەتوانین ئاماژە بکەین بە:
پژوهشی پیرامون زبان اورامی وزبانهای کهن باستانی، ژیاننامەی مەولانا موسەنیفی چۆڕی و مەستوورەی ئەردەڵان و ئەردەڵانیەکان و چەندین بەرهەمی دەسنووسی دیکە و هەروەها ئەم بەڕێزە خاوەنی بەرهەمە چاپکراوەکانی اسما درزبان کردی و هامشی بر زبان شناسیە.»
و هەروەها کتێبی «زبان‌های کردی و انگلسیی در قاموس اتمولوژی،» و کتێبی «ناو ناوەڕۆک» (وجە تسمیە) به زمانی کوردی ئامادەی چاپکراوە.
بەداخەوە شەوی 23ی خاکەلێوەی ساڵی 2724ی کوردی دڵە پڕ لە ئاواتەکەی بەهۆی نەخۆشینەوە لەلێدان دەکەوێت و لە نەخۆشخانەی سنە کەشکۆڵی تەمەنی یاغریاغر بەرەو گۆڕستان نایەکۆڵ و ئەستێرەی ژیانی بەرەو ئاوابوون ڕاخووشی و تەرمی پیرۆزی لە گۆڕستانی سەوڵاوا بەخاک سپێرا.
چەند جەرگبڕە هێورهێور میرخاسانی نێومەتەرێزی ئەدەب پەڕەی گوڵی تەمەنیان هەڵدەورێ.
ڕوحیان شاد و کەوشەنی خەیاڵمان پڕە لە یادیان و کاڵ نابێتەوە گوڵی ناویان لە دڵماندا و یادیان غونچەیەکی بەهاریە کە هەردێ وبەجوانیی دەپشکوێ.
سەرچاوەکان:
کتێبی کاروانی پێنووس [کاک فاتێح مۆستەفایی]
ئه‌م بابه‌ته له ڕۆژنامەی ڕۆژان وەرگیراوه
آدرس کوتاه خبر:
